Thursday, January 6, 2011

Ngaihtuah a Ngai Ta e.

Mizo hnam hi a naupan leh upat thuhla-ah hian sawi thiam phak piah lam thlengin inhnial theih tak a ni ang. Kan History lah hi kan han chiang lo lulai bawk si a. China ram atanga lo chhuk kan nih erawh chuan hnam naupang kan ni hauh lo thung ang le. Mahse, zir tur ngah tak hnam kan nih erawh a chiang.

Ram hrang hrang TV channel han hmet kual ila, Mizote anga zum zuk leh ti cheih cheih hi an vang pharh mai. Kan hnaivai lawka Vai naupang hote takngial pawh hi an zak lo theiin Mizote ngawt ai chuan khawi hmunah pawh boruak an ngam viau zel. Keini erawh chu puitling pawh naupang pawh stage-ah item eng engemaw han nei ila, zak hmel leh inrintawkna nei lo zet hmel kan pho lang a; kan nula tlangval lam chhuak ngam tawh chin ngiang pawh an taksa chiah lamin an tum hmur mai thinte hi a va hmuhnawm loh em!

Thlalak nise, nui sang hmel pua thla la kan vang bawk si, Zairum bula a huai zawk thlun ang maiin kan meng rum ul hlawm a. A hunlaia thil tihtur ti lova, a hun loh laia ti leh si pawh kan ang e.

Sap ngaihsanna kan thanlenpui a, ' Sai a chak ber a Mingovin thil an tithei ber' tih rilru kha kan la pu emaw ni teh chek ni. Sapho tih chu thaa kan ngaih ngawt thin hian min tikhawlo tep tawh niten ka hre rum rum thin. Sapho mai bakah hnam dang changkang deuh emaw foreigner emaw en sanna rilru kan pu tlangpui nia kan hriatna hian min tihah thin. Kan hnamah lungawi ila, eng hnam pawh hian an vun rawng hnuaiah hian 'thisen' an nei ve theuh tho a nia. Kan thisen rawng hi a inang theuh asin.

Sawi tur a tam, mahse a sei luat hmain heti hian titawp mai te'ng.

Inrintawkna neih a, a hun leh hmun ang zela insiamrem thiam tur hian kan chhungkua leh khawtlang kalphung hian a zir lo hrim hrim em ni ang? A khawilaiah hian nge siamthatna hna kan thawh tak ang le?
Posted by at

18 comments:

  1. caribouJanuary 7, 2011 at 6:31 AM

    Ka blog mawlmang taka ka thuziak mawlmang tak te ai ngawt chuan i bloga i thuziak te hi chu an lo puitling zawk fe zel anih hi. Ngaihtuahna ti thui, dawn tisei leh finna pai chhiar tur ka hmu fo ta mai.

    Khaw hran daiha chhungte hausa tak ai chuan thenawm hnaivaia mirethei tak tak te pawh an hlu zawk. Sap ho leh ram changkang kan ngaisang em em a, chutihlaiin mahni thenawm hnaivaia cheng hnamdang te nena chenho kan thiam lo hle. Kan tangkaipui miah loh Vun ngo ho kan Pathian biak lek lek laiin, an "income tax" pek tling khawm atanga min chawm liantu vai ho erawh, an Vun hang avangin kan ngaithei der si lo.

    Khel tham fe tur thuziak tha leh tawi-fel tak a ni e.

    ReplyDelete
  2. AnonymousJanuary 7, 2011 at 11:50 AM

    A dik ngawt mai. Kan la zum em chhan hi changkanna khawvela kan luhna a la rei loh vangte pawh a ni lo'ng maw? Mi 'ak' ruala kan 'ak' theih tanna kha hun rei a la ni si lo va. Tin, hei hi kan society zir loh a ni thei ang em? Hmasawn zel turah inngai phawt ila.

    I post khi ka pawm khawp mai. Zirtir nei tha tak a ni e.

    ReplyDelete
  3. triplestarJanuary 7, 2011 at 6:08 PM

    I sawi hi a dik khawp mai. Incheina en chuan changkang awm fu a lang te pawh hi media lamin kawtthlerah te an han interview a, zak lehlam hawi deuh chuih2 a an chhang te, zawhna an zawt ang tih hlaua an han tlanchhe huk emaw, an han kal sawn nul nul mai han hmuh te hian kan la hniam zia hi a chiang thinin ka hria, puitling zawka ngaih tur college leh university zirlaite pawh an bang bik chuang lo.

    Kan thenawm state hi chu naupang leh puitling pawh hian khawvel hi an ngam sarh mai a nia, hetiang hi nih ve kan tum a tha khawp mai.

    ReplyDelete
  4. AnonymousJanuary 8, 2011 at 1:17 AM

    stage ah kan chuang chhuak tawh a nih chuan mipui hmuh nuam leh an beisei ang taka chet mai tur ... tih chui chui hi a thring tawh khawp mai...

    ReplyDelete
  5. AdminJanuary 8, 2011 at 1:29 AM

    Hotupa kumthar chibai le.

    ...khrum

    ReplyDelete
  6. MuanteaJanuary 8, 2011 at 12:33 PM

    @caribou, i tilawmawm e, i sawi chiah hi ka rawn leh a che.

    @KC Lalthansanga, Hmasawn tur hian tum luih ve talh a ngai a ni tiraw?

    @Triplestar, changkan lam pan a hun tawh takzet mai.

    @khumchikthei, Kumthar chibai mawlh mawlh le.

    ReplyDelete
  7. MuanteaJanuary 8, 2011 at 12:35 PM

    @digimalt,a dik chiah. Kan lang ngam a nih chuan kan zak lo ngam mai turah ka ngai. Zaithiam pakhat tan website siamsak i tum kha, i thulh leh ta em ni? :)

    ReplyDelete
  8. H.VangchhiaJanuary 8, 2011 at 12:59 PM

    I sawi dik 100%

    ReplyDelete
  9. MuanteaJanuary 8, 2011 at 7:31 PM

    HV, Ka lawm e. Hemi chungchang hi ngaihtuah a ngai khawp a nia.

    ReplyDelete
  10. Krista RoluahpuiaJanuary 9, 2011 at 12:17 AM

    E Sir chu i thu ziak a live ting tawng hle mai a. Zirna sikulah te hian a thleng dik a sin i thu sawi hi. Mizo te hi chuan han hre viau pawh ni ila Lecturer te hi zawh kan tum ngai lem lo. Vai ho hi chu thiam emaw thiam lo emaw an ngam em em ringawt mai ni.

    Zirlai tan hetiang lampang hawi zawng hian article tha tak buatsaih la va tha dawn em...

    ReplyDelete
  11. DikiJanuary 9, 2011 at 1:26 PM

    Ngaihnawm reuh,a ningawt asin,mahni inrintawkna kan neihloh vang a,principle neilo lek a khawsa lawp lawp hi kan tam a nia.

    ReplyDelete
  12. MaisekJanuary 9, 2011 at 5:43 PM

    Ziak tha hle mai! mizo te hi chuan, hetianga boruak ngam deuh ho hi 'Zaktheilo' chhuahin kan chhuah zel a, kan nuihzat titih mai thin a, hei vang hi ani pakhat mai thei! chhungkua leh khawtlangah in zirtir kan mamawh hmasa berin ka hria!

    ReplyDelete
  13. MuanteaJanuary 9, 2011 at 10:00 PM

    Kris..article ziak hi a tha khawp mai, ngaihtuahna erawh sen a ngai deuh. I zirna hmunah Mizo hming i titha zel dawn nia.

    Diki..e heu Pi A.... i rawn leng teh tlat a, ka lawm e.

    Maisek, kan ngaihtuah chiana hma kan sawn zel chu a ngai a nih hi.

    ReplyDelete
  14. AnonymousJanuary 10, 2011 at 5:02 PM

    Pu Muante i ziak tha hle mai.1973 kuma Serkawn Christian H/S in drama kan chan min ti hre chhuak zawk mai. Kan zirtirtunu Pi Novi khan min fuih thin, zak mah ula zaklo der rawh u a ti thin

    ReplyDelete
  15. MuanteaJanuary 10, 2011 at 6:39 PM

    Anonymous..Thank you..hriat i har hle nain lemonvale i nih duh hmel ka ti (?). I tilawmawm e. Hetianga inrintawkna nei tur hian tuna naupang/thanglaite hi kan fuih an ngai khawp mai.

    ReplyDelete
  16. DikiJanuary 12, 2011 at 1:41 PM

    Muante,i thuziak a fing thin khawp mai,Zoni fak dan che ka hrilh tel dawn che mawni aw..Mahse tukhaw hriatpuiloh hian i lo lai ang tih ka hlau,sawi lo mai ang.Tawi si,tha si in i ziak thiam a.

    ReplyDelete
  17. duhawmaJanuary 12, 2011 at 2:06 PM

    A dik khawp mai. TV etc. mai nilo mi biangbiakna hrim hrimah pawh kan zakzum lutuk a(kei phei chu ka ni lehzual)hma kan sawn theiloin ka hria. Naga ho te hi hetiang lamah chuan kan phalo hle, anni chuan Foreiner lo kal te hi an be sauh sauh peih a, an hnen atanga thil engemaw beisei vang ni chuang lovin thianah an siam thiam bik a ni. An relation a that tawh chuan tanpuina etc. te pawh awlsam takin an beisei thei a ni. Mizote chuan Sap chauh nilo, vaite pawh thiana siam kan tumlo hi kan in enlet a ngai khawp mai.

    ReplyDelete
  18. MuanteaJanuary 12, 2011 at 11:00 PM

    @Diki..mate a....., mi va fak tawi thiam tawk ve! Thank You. Ngaihtuahna a awm zatve pawh ziak chhuah ka harsat asin.

    @duhawma, A dik lutuk! Kan chapo vang nge ni ang hnam dang laka han friendly deuh leh han polite deuhte hi kan zak leh tut thin. 'Pek a pek a duh lova, pek loh lai a ban zuau zuau' tih ang mai kan ni leh thin

    ReplyDelete

Subscribe to: Post Comments (Atom)