CHHUNGKUAA PA MAWHPHURHNA

Chibai u le! Chhungkuaa pa mawhphurhna chungchang kan zirho dawn a ni. Chhungkua chungchang hi chu sawi fiah leh chuan a ngai awm lo ve. Amaherawhchu, dilchhut taka zawhna –“Chhungkua hi engin nge din?” tih erawh chu chhan a har viau a, mihrang hrang chhan dan pawh a inang lo nuk ngei ang. Thinlung leh thisena inzawm tlat te, chhungkuaa a hranga khawsak hi chu ‘tuan leh mang’ ata tawh mihring nunphung a ni a, a la danglam chuang lo a ni. Amaherawhchu, khawtlang nunphung changkang leh danglam zelin chhungkaw awmdan a tidanglam ve zel a, a la danglam zel dawn bawk a ni.

Hun hlui (history) kan thlir let pawhin Pa ber chu chhungkuaa hotu leh roreltu, naupang zirna leh than lennaa mawhphurtu, chhungkaw khawsak phung leh ei leh bara mawh latu ber a ni thin. Hetih lai hian hnam thenkhatah chuan pa berin chhungkaw hotu nih a chan lohna pawh a awm ve bawk. Hun a lo liam zel a, mihring khawsak dan danglam zel avangin PA dinhmun pawh hi a tlahniam ve zel  thei niin a lang. Chhungkaw enkawltu leh thuneitu a nihna chu hmeichhia (a nupui) a zirin a lo tlahniam ve thei khawp mai. Hei hi a chhan ber ni a lang, mithiamten an tih chu ‘ei leh bara thanna leh chhungkaw member-te tan mahnia intodelh theihna kawng lo inhawn chhoh tak vang” a ni. Hetiang hian chhungkua chu lo inher danglam hret hret mahse chhungkuaa PA dinhmun leh mawhphurhna hi chu a la danglam chuang lo va, a mawhphurhna a hlen theih loh chuan “Pa nih tling lo” tia sawi an la ni reng tho dawn a ni. Chhungkaw kalphung danglam deuh avanga PA mawhphurhna thenkhat chu midang kutah awm pawh ni se, Pa a nihna erawh tawmpui theih loh leh midang kuta hlan theih loh a ni.

Pa mawhphurhna kan sawi laia rilrua awm reng erawh chu, pa nei lo Nuin a ṭulpui te, chhungkaw ro rel hlei thei lova natna khuma enkawl ngaia awm mek Pa te an ni a; a ngaihthlak dan thiam pawh a tul viau mai. Sawi zo vek thei lo mah ila, Pa mawhphurhna hrang hrang heti hian sawi hrang dawn teh ang.


1. MIPA TANA MAWHPHURHNA HMASA
Mipa tana mawhphurhna hmasa leh pawimawh tak chu chhungkua a din hma hauh pawha a chhungkaw din tur tana a mawhphurhna hi a ni. Hei hi tunlai thalaite thinlunga kan tuh ngheh a pawimawh tak zet mai. Chhungkua a din hma pawhin a khawsakna chhungkuaah a chenpuite a en dan leh an tana a tangkai danah a lo inzirlawk a ngai viau a ni. Chenpuite tana chenpui hrehawm chuan chhungkua a din ve pawhin chhungkaw nuam tak chu a din thutin a rinawm loh. Ruihtheih thil chungchanga lo fihlim lawk te, chhungkua hmangaihna thinlung lo put lawk te hi a tul hle a ni. Chhungkua a din huna a mawhphurhna tur chu a lo zirlawk tluka tha a awm lo. Mi puitling tak, tum nghet tak nei, zahawm tak leh Pathian ring mi ni a, khawvel sum leh pai, hausakna, hmingthanna leh nawmchenna um duh lo a nih chuan a lo inpeihlawk viau tiin a sawi theih ang.

2. PATHIAN LAKA PA MAWHPHURHNA
Pa mawhphurhna kan sawi chuan Bible sawi tel loh hi a har thin viau a ni. Pa chu chhungkua hotu a nih angin Pathian laka a mawhphurhna pawh a pawm a ngai a ni. Chhungkua din tura inneihna hi Pathian duh zawng a ni a, chi tam tak thlaha lo pung turin a duh a, chi thlah Amah ngaihsak mi a zawng bawk a ni. Pain Pathian laka mawhphurhna a neih avangin chhungkaw enkawlna pawh a koah a innghat bawk a ni. Hei hi mi tam takin a hre duh lo lui a, an ngaihsak lo lui a, nu ber kutah emaw an dah lui a, chhungkuain harsatna a tawk thin a ni. 1Timothea 5:8-ah chuan “Tupawh mahni chhungkhat lainate ngaihsak lo va, mahni chenpui chhungte ngei pawh ngaihsak lo chuan rinna an phatsan a ni, ring lo mi aiin an sual zawk” tih thu kan hmu. Pathian thu chuan Pain mawhphurhna a nei thu te, eng nge a mawhphurhna tih te leh engti ang taka pawimawh nge a nih a sawi chiang hle a ni. Bible hi chhungkaw pa tan chuan kaihhruaina lehkhabu (handbook) pawimawh ber a ni.

3. INNEIHNA HUANGA MAWHPHURHNA
Chhungkua kan tih hian a bul thumah chuan mi pahnihin an din a ni. Chu mite chu nupui leh pasal an ni. Ephesi 5:23-ah chuan “Krista chu amah ngei taksa chhandamtu nia kohhranho lu a ni ang bawk hian, pasal chu nupui lu a ni si a” tih kan hmu a ni. Hei hi Pathian thu a ni a, kan lo sawisel ve ngawt chi pawh a ni lo. Lu tih chuan hmangaihnaa awpkhawm hna, inpekna, rinawmna leh rintlak nihna a keng tel a ni. Pa ber chu a nupui laka a rinawm loh chuan a mawhphurhna hlen chu thil theih loh hulhual a ni. An inneihna thutiam a bawhchhiat chuan Pa tha leh rintlak a ni thei ngai lo vang. Hotu a nih avangin a mawhphurhna pawh a pawm ngei a ngai bawk. Hei hian nihna sang zawk leh hniam zawk a entir lo va, nupa mawhphurhna chu a hrang a ni tih kan pawm a ngai hle. Television leh Refrigerator hian hna hrang an nei  ve vea pawimawh zawk sawi ngawt theih a ni lo. Television hmangin chawhmeh leh tui kan tivawt thei lo va, Refrigerator hmangin film leh chanchin tharte kan thlir thei hek lo. An pawimawhna san zawng teh theih a ni lo. Chutiang bawkin nupaah pawh mawhphurhna hrang an nei a, dinhmun sang zawk leh hniam zawk sawi theih a ni lo va, teh tum ngar ngar chi pawh a ni lo. Mihring chengho leh khawsaho chuan hruaitu an mamawh a, Pa kuta hruaitu nihna a lo dah hi Pathian remhriatna a ni.

4. MAMAWH NGAIHTUAHTU
Pa mawhphurhna eng nge? tia zawh thut pawha thawk pawh la lova kan chhan dan tur tlangpui chu – chhungkaw ei leh bar thawk chhuaktu, in leh lo dintu, venghimtu leh mamawh dang ngaihtuahtu kan ti mai thei ngei ang. A dik reng bawk a ni. Pa chuan chhungkaw him damna a ngaihtuah ang a, in chhung chu hlimna leh himna hmuna a siam chu tihmakmawh a ni. Pain a fate tana a pek tur pawimawh em em chu nu enkawlna hnuaia awmtir theih a ni. Chu chu nu pawhin a hriat reng a pawimawh khawp mai. Fate pawh ngaihsak hman lek lova inchhungkhur buaina leh ei leh bar ngaihtuaha nu ber a phet buai chuan pa mualphona  a ni ve tlat. Tun laiah nupaa hnathawk kan awm nual ang a, chuti chung pawhin he thu hi chu a danglam chuang lo a ni.

Pathian laka a mawhphurhna chu Pathian duhdana a nupui fanaute kaihhruai a ni. Ngaihsan tur leh hlut tur thu-ah te, nun dan tha leh midang nena inkawmho chungchangah te, tawngkam leh mahni inthunun kawngah te pa ber kaihhruaina a pawimawh hle a ni. Amaherawhchu, chutiang dinhmun pawimawha ding ‘pa’ chuan lal a hrawt tur tihna a ni lo va, thunei ber thawka thaw reng tur tihna pawh a ni lo bawk. Lainatna leh hmangaihna nena chhungkua a enkawl erawh a tul hle a ni. Lawng kaihruaitu captain dinhmun anga dingin, chhungkaw himna leh hlimna chu Pathianin a kutah a dah a ni.

5. HLAWHCHHAMNA SAWHKHAWK
Bible kan thlir chuan Puithiam Elia te, Lota te, Davida a fapa Absaloma nen an inzawmnaah te pa-in a  fate laka a tihtur a tih loh chungchang kan hmu. Pain a tihtur a tih loh avanga tuarna, lungngaihna leh thihna hial a lo thlenzia kan hmu chiang hle a ni. Pa mawhphurhna hi thil namai a ni lo va, hlawhchhamna phei chu thil rapthlak tak a ni. Genesis 18:19-ah chuan “Lalpa kawng an zawh theih nan a hnua a fate leh a chhungte, thil fel taka ti tur leh rorel anga ti tura thu a pek theihna turin ani chu ka ruat tawh si a; chutichuan a chungchang thu a sawia chu LALPAN Abrahama chunga a thlentir theihna turin” tih kan hmu. Pa dinhmun Pathianin a dah pawimawhzia  a lang ching hle a ni. Abrahama chungchanga Pathian sawi hi kan tan pawha a sawi a ni tih kan hriatthiam a tul hle a ni.

6. PA TIH TUR ZAWHNA PAWIMAWHTE:
Kan thu sawi lai hi hun rei lote chhunga sawi zawh tur a nih avangin kan sawi duh tawk thei dawn si lo va, zawhna ang zawng hian kuai her ta ila a, a bikin chhugkaw pain mahni inenlet nan kan hmang dawn nia.
(1) Pathian hnena lawmthu sawina turin I chhungkua I kaihruai em?
(2) Engtik hun kha nge I chhungkaw member tin tan I tawngtai hnuhnun ber? (3) Engtik kha nge I fate Pathian thu I hrilh hnuhnun ber?
(4) I chhungkaw tan hun awl I insiam ngai em? Infiampui leh chhungkaw tana thil hlimawm I buatsaih ngai em?
(5) I fate zirlai, an school, an hnathawh leh an rilru puthmang I hriatpui chak tih I lantir ngai em?
(6) Engtik kha nge I chhungkua hruai chhuakin hun thawl leh nuam tak I hmanpui hnuhnun ber? Hemi ti tur hian sum leh pai hman hautak a ngai chuang lo. Chhungkua I ngaihsak a ni tihlanna pawimawh tak a ni.
(7) I fate an hma lam hun thlirpui lawkin an tih theih ang chhunte lawm takin I dawnsawnsak ngai em?
(8) Nangma nu leh pa ngei zah taka enkawlin I fate tan nu leh pa zahna a takin I lantir ngai em?
(9) I chenpuite tan thilpek emaw fakna thu emaw an hlimna tur thil I tihsak ngai em? (10) Chhungkaw hma lakna tur leh in leh lo chei dan thu-ah I nupui fanaute ngaihdan te I zawt ve thin em? Pawimawh nia kan inhriatna hmunah kan rinawmna a lang a, hlim takin kan awm thei thin.
(11) Chhung inkhawm in hmang thin em? (12) An tana tha nia I hriat avangin ‘aih’ tiin I chhang thin em? Inchei dan, pawla inhmanna tur, intihhlima hmun leh programme thenkhatah te an tana tha lo turah ‘aih’ tia chhanga khap beh a tul hun a awm a; chutiang hunah chu nghet taka din chu Pa tih tur a ni.
(13) Khua leh tui tha tak ni tura tih tur leh tih loh turte I hrilh ngai em?
(14) Chhungkaw tan thutlukna I siamin eng vanga chutianga thutlukna siam mai nge I nih tih an rilru tur dawn chungin I hrilhfiah thin em? Chhungkaw hotu I nihzia I lantir rualin I nupui fanaute pawhin an zawm theih na engvanga chutiang thutlukna siam nge I nih tih an hriat a pawimawh fo thin.
(15) Tawngka leh thiltihin I chhungkua I hmangaihna, I rintawkna leh an himna I ngaihtuahzia engtik nge I lantir hnuhnun ber?
(16) I fate tan thian kawm tur fimkhur tur leh midangte laka awmdan tha I zirtir ngai em? Tin, I fa tleirawlte tan kawppui zawn dan chungchang I titipui tawh ngai em?
(17) I fate duh zawng leh duh loh zawng, an thiltih lai, an awmna hmun, an thil chhiar thin leh an thin kawmte I ngaihven ngai em?
(18) An zirlai I ngaihvenpui rualin Pathian thua an nundan I ngaihvenpui ngai em? (19) I faten I inchhungkhur  hmasawnna tur kawng hrang hrangin I ngaihven hle niin an hria em?
(20) I fate mithmuhah I nupui I hmangaihna leh zahna I lantir ngai em? I faten in nupa nun dan ang chiaha awm ve an chakin I ring em? Hei hi fate zirlai pawimawh tak a ni.

Heng zawhna 20 pawimawh tak takte hi Pa tan chuan hriat reng a pawimawh khawp mai. Tihhlawhtlin vek a nih loh pawhin tihhlawhtlin tuma rilru siam a nih chuan a la tha hrim hrim bawk a ni. I kalna ngai lohah chuan I hruai thei lo va, I hriat loh chu I zirtir thei hek lo. Pate hi zirtirtu leh hruaitu an ni. I thil tum ber chu, I theihna zawng zawnga I nupui fanaute, tumah hloh lova Vanram thlenpui a ni tur a ni. Pathian leh mihringpui tana theihtawpa thawk turin tanpui la, I hun a liam hnu pawhin thutaka an nun reng theih nan an nunah mei chhem nunsak rawh. I chi tuh ngei chu I seng dawn si a. I tih tur tia I mawhphurhna I hlen chuan rah tha I chhungkaw tan leh ram tan a chhuah ngei ang.
Ka lawm e