SALEM VENG ATANGA THLIR LETNA

 

C. Lalhmingmuana

Salem veng atang hian ka han thlir let a, kan Zoram ngei mai, a bikin Lunglei leh a chhehvela Sapho leh lalho sulhnu hnutchhiah, a \ha leh \ha lo pawh tam tak a lang a, a lang zawng zawng erawh ka ziak lang vek s>ng lo. Kum 1900 hma lam phei kha chu thing leh raw innawh lai tak tak a ni a, hmun tinah buaina chhum a zing a ni ber e. Tlang hrang hrangah mahnia ro inrelin, mahni tawka thuneihna punhlum nei chung leh, na taka mahni ram humhalhin pi leh pute an lo khawsa tawh \hin a, ram dang hnam dang an ngai bik lo hle. Chutih laiin Kumpinu sawrkar chuan ram l^k chin tawk a nei lo ve thung a, ramah a tuihal em maw tih turin ram a awp hnem hle a ni. Chuvangin, hnam changkang tak Kumpinu sawrkar khan kan pi leh pute sadai a rawn \hiat tel ve tlat mai. An ram chhuahna leh an ram luah chin an rawn n>k an rawn n>k takah chuan, ‘thih leh ruam khatah, dam leh tl^ng khatah’ ti \hin Mizo pasal\hate thin a so ta a, Kumpinu ram awp chinah hriam an lek zui ve ta a ni. Hetianga an inchemh^r takah chuan sawrkar chak tak British chuan kan zotl^ng ram nuam, kan chhuan em em pawh an rawn luah ta a. Thil tam tak inthl^k danglam chhovin sakhuana thlengin kan hnam nun a sawi danglam zo ta a.

Hnam kawlhsen leh thunun hara British-hovin an ngaih, tlang ram cheng Mizote leh Zohnahthl^kten British-ho awp chin rama hnuhma an zu neih dan hi chhinchhiah fel a awm tam lo hle a, kum 1800 hma lam phei chu hmuh tur a awm lo hial a ni. Hmanlaia kan pi leh pute khan phaitual zu run hi an lo ching ve fe tawh mai a, mi lu tam tak hawnin sal leh rall^k sum an hawn tam \hin hle niin a hriat. Chutianga thil hlu hawna leh salte an man \hin avang leh an chenna ram an humhalh avang te chuan phai ram hi an run \hin ni berin a lang. Chhinchhiahna hmuh theih chinah kum 1824 – 1854 inkar khan vawi 19 lai phai an zu run a, mi 107 lai thatin, mi 15 an hliam a, sal atan mi 186 an man bawk. 1854 hnu lamah pawh hian hmun hrang hrangah Vai an run hi hmuh tur a awm a, a hnuhnung ber chu kum 1892, April ni 4-a Hailakandi-a Boruncherra thingpui huan Lalburha’n a run kha a ni. Hemi \um hian mi 45 thatin sal 13 an kai bawk. Mizoten Vai an runa an thah zat leh sal an man zat tak hi chiang taka hriat theih a ni lo va, mi an thah \euh thu leh in tam tak an hal thu te hi sawi a ni liam mai mai bawk a. Hriat theih chinah chuan khaw 43 an hal a, mihring 705 thatin salah mi 1034 an man. Sawi tawh angin \awngkaa inhlan chhawn a nih \hin avang leh ral lu an lak zat chiah sawi harsat chang a awm avangin a z^t chiah hi a chian theih loh a, tar lan ai hian a la tam ngei ang.

Lunglei hun hlui thlirna:

Lunglei tlang luahtu kan hriatchian theih hla ber chu Sailo lal Vansanga a ni. Thlahtu lamah chuan an hnam hming put \anna Sailova’n Chungnunga a hring a, Chungnunga’n Lalchera a hring. Lalchera’n Rolura Chhipphir lal a hring a, Rolura’n Lalrivunga a hring. Lalrivunga’n Khawnglung lal |huama a hring a, |huama’n Vansanga Lunglei lal a hring. Vansanga’n Lunglei tlang a \hut hun hi hriat chian a harin, hetih hunlaia thil thleng pawh ziaka dah hmuh tur a vang hle a ni. Ziaktu \henkhat chuan Vansanga’n Lunglei a \hut hun hi 1830 – 1860 niin an ngai a; mahse, hei hi ni theiin a lang lo. Kum 1856 khan Chhim leh hmar indo a chhuak a, Lallula thlah Vuttaia leh Rolura thlah Lalpuithanga-te inngeih lohna avanga indo an ni ber. He indona hian hun a duh rei hle mai a, a khat tawkin an inrun tawn \hin. Kum 1859-a Khawnglung run khan he indona hi a titawp ta a ni. Khawnglung run laia an lal chu |huama a ni a, a fate chu Vansanga, Laltawna leh Lalhleia te an ni. Khawnglung runah hian lalnu Darpuihluti Thangluah leh lal fapa naupang ber Lalhleia-te chu sala man an ni a, |huama te pafa thum erawh an tlan chhuak thei ta hlauh a. Khawnglung a\ang hian Lunglei-ah an kai niin a lang a, hetah hian Vansanga pa |huama pawh tel a tel ve zel nain Lunglei chu a fapa upa ber hminga \hutin  ‘Vansanga Lunglei’ tih a ni ta a ni. Lunglei a\anga an pem leh hnu hian Vansanga’n Lungmawi a zuan a, Laltawna’n a pa |huama chu Saza-ah a kaipui thung. Hetiang a nih takah chuan Vansanga’n Lunglei a \hut kum hi 1860 tiin a dah ngamin ka hria.

Vansanga hunlai hian Lunglei chu in 500 khua zet a ni a, an elpui ber, Lunglei thlang lawka awm, Lalngura Sailo khua Thehlep pawh in 500 khuaa inchhal tho an ni. Hetih hunlai hian Lunglei leh Thehlep hi an inter tawk hle mai a, Lunglei pasal\haten sai ram chhuah an uarin an sai kah \hin chu chhuan pawh an chhuang hle. Thehlep pasal\hate erawh, an lal Lalngura Sailo kha pasal\ha a lo ni bawk nen, an sakei kah tam an chhuang hle bawk a. Hetia an inel viau karah hian Lunglei pasal\ha hotu ber leh an tawlrel ber Pachuaia Khiangte erawh a hming a langsarin tluk loh rim a nam hle a ni awm e. Hla pawh an inphuah el khum nasa ngiang e.

“Leitlang vali’n chhimtiang sai maw l>m ang in zawl le!

Hleppui valin kawlkei zia \ial d^r ang kan chhai,

Tu than sang maw Bawmzo chenin”

 

Vansanga hunlaia Lunglei khaw awmna hmun hi tuna Chanmari veng chung, Civil hospital phei leh khaw mawng lam, chhuah chhawng mual thluang thla thui tak a awh a ni. Helai hmunah hian an inbengbel tawh ngei a ni tih a chianna chu, Chanmari veng an tawlh thlak zel hma hian serfang kung tam tak hmuh tur a awm a, mihring ruhro, hlum bel keh them, tuibur lu/liang leh chem chhia te an lai chhuak a ni.

 

Chutianga khaw ropui tak chu lo ni tawh mah se, Lunglei chu luah lum reng niin a lang lo va. Vai len vawi khatna (1871 – 72) hunlai vel khan Vansanga hian Lungmawi-ah a kaisan tawh niin a lang. Lianlula thlahte khan chhim vai lian kha an lo kap nasa ber a, Rolura thlahte, Saphovin The Howlongs an tih maite nen erawh buaina lian an nei lo thung. Vansanga hian Lunglei la awp ni se in 500 khua zet awptu chuan thu leh hla a nei ngei tur a ni a, a hming a lang mang tlat si lo a ni. Vai lianin an tum ber Mary Winchester pawh chu January ni 21, 1872-ah an la let leh thei ta a ni. Mizo lalte kuta tang sal tam tak an chhuah bawk a. Rolura thlahte leh Lianlula thlahte nen hian inremna fel tak an siam nghe nghe a ni. March ni 31, 1872-ah Chhim vai lian, Lushai expedition (Right or Chittagong column) chu tihtawp a ni ta a.

 

Vai len vawi khatnaah hian Lalngura Sailo pawhin Thehlep awp tawh lovin khaw thar a kaisan tawh a. Thorang tlang chhip a\anga mel 8 vela hlaah Kawnpui khua a din a. Vai lian lo dodaltu ber Savunga fapa a nih avangin Lalngura khua chu lak ngei an tum a. Lalngura Sailo khua Kawnpui hi an lo inbuatsaih \ha hle mai a, an khua chu kulha an hung vek avangin Sapho tan pawh beih a buaithlak ve hle a ni. Sapho pawh chuan inphen nan lung te tiang khawmin kulh hi an kap bawk a. Lalngura khua hi chhim Vai lian vawi khatnaa an inbeihna nasa ber a ni hial awm e. January ni 4, 1872 –a inbeihnaah hian Gurkha sipai pakhat a thi a, 9-in hliam na tak an tuar a, Capt Battye pawh na lutuk lovin a inhliam bawk. January ni 6, 1872 chuan Lianlula thlah Sailo lalte hotupa ber, Savunga khua Buarpui chu an pan ta a. Hetah hian Mizorama a vawi khat nan laipui (7 pounder) hmangin Savunga khua chu an kap ta a ni. Chutianga silai lian leh thawm n^ chu la hre ngai hek lo, an hlau ta hle mai a. Inbeihna nasa em em pawh awm lovin Savunga khua chu an la thei a, a tukah an hal zui ta bawk a.

 

Fort Lungleh:

Vai len vawi khatna hnua Mizo lalten British ram awp chinah hriam a lek zui leh tak viauah chuan Sapho pawh mawnga hawlh ang sekin an awm leh ta a. December ni 19, 1888-ah Lushai Hills-a sipai rual tirh luh chu an rel thlu ta a ni. Lt. Stewart leh a hote an thah avanga phuba l^kna chu an tum lian ber niin, a remchan anga sipai thuthmun siam tur leh a theih chin china kawng sial turin Tlabung atangin ‘Lushai Expeditionary Force’ tia vuahte chu an rawn thawk chho ta a ni. Colonel Vincent Tregear (a hnu lawkah General a kai) hovin sipai 2000 leh puakphur 2500 bakah laipui 2 leh sai 38 nen an rawn thawk chho ta mup mup mai a. Mr Layall chu Political Officer niin, G.A.S Bedfort leh C.S Murray (Mizoten Marliana an tih) chu Asst Political Officer an ni a, Captain J. Shakespeare (Tarmita) chu Intelligence Officer a ni bawk. January ni 16, 1889-ah Tlabung a\ang chuan Sai kal theih tura zauvin (feet 4 – 6) kawngpui sial hna an rawn thawk \an ta a, March ni 11 1889-ah mel 41-a hla Lunglei chu an sial thleng ta a ni. Hei hi Mizorama kawngpui hmasa ber a ni. Lunglei-ah chuan kulh rinawm tak, Fort Lungleh an sa a, awmhmun khuar nan an hmang zui ta a.

 

Vansanga’n vai lian a kap:

Chhipphir-a Vansanga a \hut laiin, March ni 15, 1892-ah  Capt Shakespeare leh a hote Aizawl pan tur chu Lalhleia khua Zote leh Laltawna khua Lungrang tlangvalten Chhipphir khaw daiah an lo kap a, Dokhuma Chawngtleng lalin a rawn pui bawk a. Shakespeare leh a hote hi tlangah inkulhin an inkap nasa hle a ni. Hetia an inkah hma hian Shakespeare hian Darmaka Ralte (Pukpui lal ni zui ta) chu Vansanga hnenah a tir a; mahse, inbiakremna an neih theih tak lohah chuan an inkap ta a ni. Mizo lalte hian sipaiho chu an dangchar hneh hle mai a, Shakespeare pawh a mangang ve hle a ni. Bualpui lal Lalluauvan ei turte pein a lo \anpui a., chuti ni lo se intung nung theiin an khawsak a rinawm loh. Shakespeare leh a hote chan chau tawh tak \anpui turin May ni 3, 1892-ah Chin Hills Burma a\angin Capt H. Rose leh a hote lo thlengin an rawn chhanchhuak ta a ni. Lalburha khua Sesawng leh Vansanga khua Chhipphir-a inbeihna hi Bristish-ho do letnaa inkahna nasa ber a ni hial awm e.

 

Lunglawn khua din a ni:

Rolura thlahten Lunglei chhehvel an luah laia lal ropui tak pakhat chu Rolura thlah, Tlutpawrha fapa Seipuia hi a ni. A khua leh tui zingah hian mi hmingthang tak tak an awm a, chungte chu – pasal\ha huaisen leh fing Chawngbawla, Sap missionary lo kal tur inlarnaa lo hmutu Darphawka, Sele hmingthang tak kaptu pasal\ha Sawibunga te an ni. Seipuia hian Lunglei chhehvel hmun hrang hrangah khua a siam a, a pa Tlutpawrha nen Khawthir an din a, chumi hnuah chuan Kawmzawl, Riatte, Ralvawng, Zohmun (tuna Ramzotlang)-ah te kaiin a ram pawh a zau hle a ni. Lunglawn pawh hi Seipuia ram vek a ni \hin a; mahse, Saphovin kuli tur an phut reng avangin Sapho hlata awm kha a duh a Lunglawn ram pawh a hlatsan ta zawk a ni.

 

Ralvawng lalnu hmingthang Ropuiliani chuan a pasal Vandula thih hnuah pawh huaisen takin ro a rel zel a. A khuaah hian pa fing zet mai Lalchhunga Zadeng awmin, ani chuan khua neiha inrelbawl hran a duh ta a, Lunglawn tlang luah chu a tum ta a ni. Tichuan, kum 1895 -97 khan Lunglawn tlang zuanin chhungkaw 5 chauh nen an khawsa ta a. Hetih lai hian Lunglawn chu khua ni lovin ‘veng’ hming a la pu a ni. Lalchhunga hi pa fing zet mai leh rorel thiam tak a nih avangin Sapho lawm zawng taka awm pawh a thiam hle a. Chuvangin, sawrkar pawhin, a dil angin kum 1908 khan lal nia khua \hut theihna ‘Tlang lehkha’ an tih mai chu a pe ta nghe nghe a, lal dik tak niin a thlahte thleng pawha lalna inrochun thei an ni ta a ni. Lunglawna Kristian hmasa ber chu pasal\ha Chawngbawla fapa Saizema a ni a, kum 1907-ah a thi.

 

Salem veng chu

Lal khua a nih avangin Lunglawn ram chu a zau hle mai a, tlak lam leh chhuah lamah ram zau tak a awh a ni. Kum 1997, April ni 4 khan Lunglawn leh Ramthar la hek ve vein Salem veng chu a lo in dang ve ta a. Ramthar veng pawh Lunglawn a\anga in dang ve tho an ni bawk. Salem veng hi veng naupang tak ni mah se, Seipuia lal ram, chumi hnua Lalchhunga lal ram chhung a lo ni tawh \hin a ni. Lunglawn lalin a awp lai hian tuna Salem veng lam hi an zu dai dar em em lo ni tur a ni, hmun pawimawh leh hmanlai sulhnu hmuh tur a awm vak lem lo. Helai hmuna zu khawsa hmasaten 1970 kuma tuna Kawizau kan tih taka an zu awm \an tirhah pawh ‘khutiang veng tlabirhah te in awm peih mai mai e’ an tih liamsan mai mai a ni awm asin. Chutiang a nih avang chuan hmanlai hmun hlui pawh a awm lem lo nain tlema zawng chu ka han khawn khawm lui hram teh ang.

 

1. Aikh^: Salem veng chhunga luit> pawimawh ber chu Aikha lui hi a ni lo thei lo. Aikha tih hming a putna hi a rei thawkhat hle tawh a ni tih a hriat a, an phuah hunlai hriat a ni lo nain Lalchhunga lal laia phuah a nih erawh rinhlelh rual a ni lo thung. He luitea chakai an man, an han ei dawna tui vak lo leh kha ta deuh a nih vanga he luite hming pawh hi ‘Aikha’ tia vuah a nih pawh a rinzawn theih mai awm e. Veng mipuite tana tuikhur pawimawh ber – Aikha tuikhur leh tunhma lama ‘Li zau’ an tih \hin, tuna BMP tuikhur an tih takte avang te, a lui dung tluana veng mipuite insukna lui ber a nih \hin avangte hian Salem veng luit> pawimawh ber tih loh rual a ni lo.

2. Pi Chhumi kai: Tuna Salem mual panna, Pangkai tuikhur bulah hian zo kawng te reuh t> a kal \hin a, chu chu Pi Chhumi’n leipui a neihna kawng niin Pangkai lui a kanna \hin a nih avangin ‘Pi Chhumi kai’ an ti ta mai a ni. Pi Chhumi tu leh fate hi Lunglawn-ah an la khawsa nual hlawm a. Melkhat Primary School (tuna Salem p/s) zirtirtu ni \hin, Pi F. Thansangi pasal, Pu Darkunga nu a ni.

 

3. Pu M>la kai: Pu HC Muanthanga in piah, Pangkai lui, tuna Pu Thangpuia in panna kawng, Pu C. Hualhnuna rama va kaina lai hi zo kawng te tak t> bawk a ni \hin a. Lunglawn pa taima, Pu M>la leipui panna kawng leh Pangkai lui a kanna lai a nih avangin ‘Pu M>la kai’ tih a ni. Kawng thlang chiahah hian li lian lo tak a awm a, chu pawh chu ‘Pu M>la li’ tih a ni bawk \hin. Pu M>la hi kum 1905-a piang a ni a, kum 1979 khan a thi. A fate pawh Lunglawn-a khawsa la awmin Pi C. Lalnunmawii hi a fanu naupang ber a ni.

 

4. Li zau: Tuna BMP tuikhur kan tih tak mai hi ‘Li zau’ tih a ni \hin. Lungsum ang deuh pakhat leh li tengsawl ang deuha awmin thuk leh zau tak chu a ni lo. Li lian pan ve pha lo naupangten hnungzang lang ruak ruaka an chen ve theihna tawk lek a ni a, insukna hmun lun ber pakhat a ni \hin. Aikha tuikhur a\anga hian luikamah kawng a kal a, engtik lai a\anga awm tawh nge tih pawh hriat loh thing luang a inkham ruah bawk \hin. Pu Hrangzama in sir kawr chhuk thla nen a infinna laiah hian ‘hulhu’ hmun a awm \hin a, naupangho chenna, an suk buk a ni \hin. Hulhu zikno chu inbailem chhuana an chawhmeh pawimawh tak a ni leh bawk.

 

Sawi tawh angin Salem veng hi veng naupang tak a nih a hnu hmanah, lal awm hunlai pawha an khawsakna hmun a nih loh avangin hmun hlui pawimawh sawi tur a awm lem lo va. A awm hmasate pawh kum 50 zet zawt liam ta, kum 1970 a khawsa \an an ni mai chauh a. Mi an chen bel tawh hnuah erawh hmun pawimawh ve tak tak a piang chawp ve mai bawk. Pathianni tlaia nula leh tlangvalte len khawthawnna ‘Kawihnai’ te, ruai \hehna/cinema chhuahna/naupang inthapna/tlangvalho thlasik ni lum aina hmun ‘Kawizau’ te, naupang sport-na/cultural dance zirna/innghahkhawmna hmun ‘Pu Chala mual’ te, Venghlun (Salem) naupang tui chenna hmun Pu Thangchuailova swimming pool te, naupang leh tleirawlho mei zuk rukna hmun tlang pawng, tuna Salem biak in awmna te, Pu Dengbana tuikhur te, ldt. hi hmun pawimawh tia sawi ve theih mai chu a ni awm e.