NUNNA HI A HLU BER E

 

Hringnun buanpuite kan buanna buanzawlah hian,
Arpa chan changa hnehna kan aupui ch^ng a awm a,
Thinlung ruma chauva kan tluk der chang pawh a awm bawk thin.
Mai lumin a hnun leh a mawng lam a tihlan chhawk angin,
Hlim ni a lo thleng thin, lungngaih ni pawh.
Mangannain min hual a, tlan chhuahna reng awm lo angin,
Eng lam reng hawi theih loh hun a lo thleng fthin.
Chutiang hunah meuh chuan a chhe ber thleng tura thu tihtluk a awl a,
Beiseina kawl eng a lang thei lo va, nun hian awmzia reng neiin a lang lo bawk thin.
Hringnun hlutna kan hmu thiam lo va, duhsaktu aw ri a ring tawk zo lo va,
Hmangaihtu hmel lah a lang fiah thei hek lo.
Vai kian zawh rual loh thimna chhumpuiin min chimin kan hria a,
Chutah chuan nun hlutna a bo va, khawvel thl^khlelhna reng a awm tawh lo.

Mahse maw, chungpikna hual vel karah chuan awm mah ila,
Mahni nun meuh pawh hlut zo tawh lovin lang mah ila;
Kan ta emaw kan tih kan nunna hi min petu a awm tih a lang chiang a,
Ani chu nunna neitu a ni a, a neitu chuan a lo hlut na meuh mai.
Nunna siamtu chuan nunna chu leilung nen a khaikhin a,
Namen lova tam tuifinriata tui zawng zawng nen pawh.
Leilung thuneihna rawn intar lanna thlipui leh ruahpui nen a buk a,
Lunghlu tha mi leh rangkachak mawi tinreng nen pawh.
A thlang zawk asin hringmi nun hlu, ama kut ngeia a din kha.
Duh taka a siam, tlai ni lenpui atana a duan ngei kha.
Eng dang rengin a hlutna a khum zo lo va;
A thinlungah luahlantu an awm lo va, ropui zawk reng an awm lo.

Thlipui nasa tak a lo tleh lai khan, namen lovin tui chu a fawn a,
A fawn sang zel chuan an lawng chu a rawn khuh ta hlup hlup a.
Zirtirte chu mangangin an awm a, nun chan mai thei dinhmunah an din avangin.
Mahse, engkimtithei Isua chu, a thuneihna zawng nen a rawn tho va.
A thilsiamte zinga duh thlang tur dinhmunah ding mah se,
A thlan zawk turah a chiang a, inngaihtuah a mamawh lo.
A thilsiam thlipui leh tui aiin hringmi nunna chu a thlang zawk a,
Thlipui leh tuifawn chu hauvin, “bang rawh u, bang rawh u.” tiin.
Thlipui a ngawi a, tui fawn a reh a, zirtirte erawh hlimin a au si.
A hlut zawk nunna chu a chawi sang a, nunna tharin a thuam a ni.

Uirenu an man lai khan, a sualnain a mihring hmel a hliah a,
A nunah thiamna reng an hmu lo va, chhe lailet derah an chhuah a ni.
Dan atangin an en a, an chhui a, eng dang an hmu lo,
Mi sual uirenu an hmu a, thihna khawp sual a ni an hmuh ni.
Isua hnena an rawn hruai erawh chuan, a sualna aiin a nun hlutna a langsar a,
Mi sual thi tlak ni lovin, tisa leh thlarau neia a din, sual bum a ni tih a lang chiang zawk a;
A sualna aiin a nunna hlu tak chu a hmu zawk a, duh taka a din ngei chu.
‘Sual nei lovin deng hmasa se’ a tihna chuan hnehna a thlen a,
Nun reng nei tawh lo tura ngaih chuan a nun siamna hun a nei leh ta.

Engkim siamtu chuan nun min pe a, kan enkawl turin.
Kan nun hi ngai hlu hle teh ang u, a thlawna kan dawn a ni si a,

(Dt 26.10.2023 zan dar 9:06. Naktuk Dt 27.10.2023 'Zirlaite Ni' a Recitation sawi tura min ruat avangin he thu hi ka sawi atan ka phuah a ni.)