Monday, May 2, 2011

Mizo tawng zir ang

ZIRLAI : Ziak zawm leh ziak zawm loh
THLUR BING ; Thuhmabet(Prefix) leh Thuhnubet(Suffix)

Bung 1-na : Thuhmabet(Prefix)
Sawifiahna : Prefix leh suffix atana hman thumalte hi thu bet an nih rualin an mal din ve tho thin avangin zir chian leh lak hran thiam a ngai hle.

Prefix chu thumal hma lama thu bet hi a ni mai. Heng - ‘in’ leh ‘ti’ te hi an ni ber a, modified form-ah ‘ti’ chu ‘tih’ a nih avangin prefix ho chu - in, ti, inti, intih - te hi an ni ta a nih chu.
Entirna : Infak, innei, insu, inkhel, inchei, ldt..

Heng bakah hian ‘in’ hian thumal dang a siam thei a, mahse chung ho chu prefix an ni chuang lo.
Entirna : inleng, inriak, indang (fapa indang) te hi thumal hranpa an ni a, prefix an ni lo. Chutiang bawkin ‘ti’ leh ‘tih’ ah pawh heng hi thumal hran an nih avangin prefix an ni lo bawk - ‘I ti zo tawh em? / Tih theih chi a ni lo, ldt. ‘Inti’ ‘intih’ hi inhau tih nan leh inpawl (sex hmang) tih nan chauh verb-ah kan hmang.
Entirna : Engah nge in intih? Inti suh u. ldt.

Tin, thumal pakhat ‘a’ hi prefix ang takin hman theih mahse thu inkeng tel sa tlat an nih avangin then hran a buaithlak hle a ni. Prefix ang viau mahse Prefix erawh a ni lo.
Entirna : achha, achhapah, ahnekin,apiang, anazawngin, anaranin, aruangin, atalangin, asin, avangin, azarah, ldt.



Bung 2-na : Thuhnungbet(Suffix)

Suffix hi thumal tawpa bet a nih avangin ‘Thuhnungbet’ ka ti ve mai. Chungte chu - a, ah, awm, ho, in, na, pui, sak, san, te, thlak, tir, tu leh zia. Thuhnungbet an nih avangin a behna thu nen inzawmtir ngei tur a ni. Heti hian a chiang maia ka hriat avangin an mal din hun/a hranga hman hun entirna pe zawk mai ang.

Suffix atana kan hman an mal din hun :
1. A kal ta a
2. I ipte ah chu a mawi hle mai.
Note : ‘ah’ tih hi ‘atan’ tihna thova kan hman hun a awm thin. Chung hunah chuan ziak hrang lem lovin a hmaa thu nen inzawma hman a tha ber.
Entirna : He nula hi nupuiah nei ta che
3. Heta hi ka awm e
4. Thu ho deuh deuh sawi suh
5. In in bulah zu in in elo?
Note : ‘in’ hi noun a hman a nihin ziak zawm loh tur a ni.
Entirna : Kan in, Damdawi in, Biak in, Bual in, ldt.
Tin, natna chungchangah ‘zun-in’ (suppression of urine) hi natna hming a nih avangin noun a ni a, chhiar sual palh loh nan hetia ziak hi a tha - Zun-in. Verb a nih chuan a hranga ziak tur
Entirna : Zun-in hi a hrehawm ve viau (Noun)
I zun a in elo? (verb)

6. I hliam chu a na viau em?
Note: Natna hming ni chiah lo, taksa na kan sawiin ziak zawm loh tur.
Entirna : Pum na, Kal na, Lu na, Thin na, ldt.

7. Min han pui lawk teh
8. He lung hi a sak khawp mai
9. Sang modification san te, puan fan/chhe lek leka fan duar sawina - puan san te, Sang (tall/high) modification san te, double adverb - san san te hi a hranga ziak tur a ni.
10. ‘te’ hi conjunction-a hman a nihin a hranga ziak tur a ni.
Entirna : Lala te, Liana te an lo leng.
Tin, thu tihkimna atan conjunction anga kan hmanin ziak hran tur a ni
Entirna : Intihfai te chu kan tih ngei tur alawm.

11. Heta hi ka awm, mi tir ta che
12. Tluanga’n a nupui a thlak
13. A tu ber hi nge?
Note: ‘tu’ hi Intransitive verb-ah belh loh tur. Ent. Dingtu, kaltu, zaitu, ldt. tihte hi a dik lo
negative verb-ah belh loh tur. Ent. Ring lotu, Hre lotu, ldt. tihte hi a dik lo, ‘tu’ aiah ‘te’ hman zawk tur.
Auxiliary verb ‘tawh’ nen zawm loh tur. Ent. Sawi tawhtu, Hre tawhtu, Hmu tawhtu, ldt. tihte hi a dik lo, ‘te’ emaw ‘apiang’ emaw hman mai tur.

14. Awze mite aw chu a zia (v)

Duh tawk phawt teh ang.

15 comments:

  1. 'Hotu lian te' thuziak nge nge, a puitlingin zir tur a pai tam kher mai.

    ReplyDelete
  2. Ka tangkai pui thei khawp dawn e. :)

    ReplyDelete
  3. A tha khawp mai. Mizo tawng hi subject khat chu a tling ve chiang khawp mai. I post-ah khian sawisel tur ka hre lo. Duhthusam lo deuh pakhat anga ka ngaih chu - 'ah' hmanna pakhat khi a ni.

    'Atan' nena awmzia inang 'ah' hi chu a hmaa mi nena a inzawm dawnin hyphen dah kher thain ka hre thin. Hei hi hriathran a awlsam zawk nan a ni lo va, suffix dang 'ah' nena a inan loh vang zawkin.

    ReplyDelete
  4. Caribou & HV, In tilawmawm e.

    TS, Hyphen hman chu a inhmeh dawn em n? Chhiar sual awl deuhah chauh lo chuan dah loh hi a chichawm lo zawkin kei chuan ka hria.

    ReplyDelete
  5. Ka van tangkaipui em !

    ReplyDelete
  6. Hei chu post update dawn apianga va chhiar hmasak ziah chi a nih hi, kan chhiar liam puata, tha kan ti em em a, kan theihnghilhleh(?) mai thin.

    ReplyDelete
  7. triplestar, i tilawmawm e, i inchhawp nghe nghe dawn em ni chutia i theihnghilh zel chuan? :)

    ReplyDelete
  8. A tha hle mai, ka fiah ta uar e.

    As_Khiangte

    ReplyDelete
  9. A tha khawp mai. Mizotawng ziak dan hi ka theih tawk in ka uluk ve thin a. A har a ni ang, tihsual hi ka nei reng zel mai. I thuziak hi ka tangkai pui khawp mai.

    ReplyDelete
  10. Lapuii ChawngthuJuly 18, 2012 at 1:52 AM

    Hetiang hi a lawm ka zawn chu, ka lawm hle mai. Ka keu ngun dawn khawpin ka hria. Ka thiam loh luatah zawh belh tur pawh ka hre mai lo. Tuna ka ziah ah hian dik lo a awm em?

    ReplyDelete
    Replies
    1. ziah ah - ziahah, a lawm - alawm tih mai te hi :)

      Delete
  11. Mizoram English medium chhuak nih hi tha lo ka tihna deuh chu, Mizo tawng bahlah tawk lek, broken english an tih pawh han pha mang si lo hian English hi kan hre ve nel nual a, English hmang dik lo tawk vel, Mizo tawng pawh ti dik chuang lo vel hian kan tawng ve vak vak ringawt a, pawi tak a ni. Achang chuan mahni tawng ngei a han ti ti te hi a inthlahrun awm tep thei a sin. Mizo tawng hi tunah pawh Upa te ti ti hi ka ngaithla lui hram hram zel. Hetiang thuziak te hi a tam thei ang ber chhiar tur awm se, a la hlu chho zel dawn a ni. High school kan kal lai a Mizo Idioms and phrase te kha lei tur la awm tak maw, chhiar that leh tak a ni ka duh ni. Ziah zawm tur an tih leh zawm loh tur an tih phei hi chu thliarhran thiam a har tawh ka ti khawp mai..... Han ti zel teh tha ka ti riau mai.

    ReplyDelete