Chung thangvan ka han thlir a,
Hriat loh Siar lengrualten lamtluang an chhui e;
Engzat fakau nge maw kei lei mi,
Hriat phak bakah hian awm ang le?
Thiam zir thuiten an chhui, an thlir, an zir,
An hriat chuan tawp chin a nei;
An hriat loh erawh tawp chin nei lo ang mai a ni,
Khawl leh hmanraw tha ber pawh hmang se,
A daih lo’ng he lei hringnun hian,
Ka Pathian kutchhuak ropui hre zo turin;
An damchhung ralin bei mahse
A chanve pawh an hre lo’ng e.
Ka Pathian ropui siam a ni tlat si.
Thiamna leh zirna nei lo kei erawh chuan,
Thiam sang ho hmuh phak loh ka hmu;
Kalvari-a thisen zarah ka tan a buatsaih,
Chatuan ram engmawi chu a la chiang ngei;
Rinna mitin ka hmu, a va ropui em!
Thilsiam ropui siamtu Pathian chu ka Pathian a lo ni, Haleluia!
Lei mi ropuite chu nitin an hmanhlel,
An nun hlimna zawngin kiltin kilting an fang;
Sum leh paiah hlimna an zawng,
An nei, an neih belh zel a;
An ngah poh leh an hrechiang si,
Sumin hlimna a lei thei lo tih hi.
An hringnun lah an pawtsei thei chuang si lo,
Kawla ni chhuak chhiara thawkin;
Ropuinaah hlimna zawng thin mahse,
Reilote chu an hlim ve thin mahna;
A daih rei mawlh lo tih hretu chu anmahni.
Thihna hlim kawr ruamah leh
Lungngaihna chhum dum karah,
Nun chau leh khawhara an awm laite’n,
Nun hahchawlhna an hmu lo, an hmu mawlh lo.
Sum leh ropuina chhuan tur nei lo kei hi
An aiin ropuiah ka inngai e.
Kraws-a thisen luang kha ka tana luang a ni,
Ka sual ngaihdamna chu;
Chumiah chuan Pa lung a awi tawh si a.
Chhandamna chuan thil hlu min hnutchhiah:
Lungngaihna hmuna lawmna,
Harsatna hmuna beiseina;
Mangan laia innghahna lungpui,
Hmelma laka inhumhimna kulhbing;
Mamawh laka chhanna duhawm,
Aw, ka tan hian a va hlu em ka Pathian hi!
Ka hnenah a awm reng si.
Eliza maichama halral thil hlan leh
A vela tui zawng zawng kang raltu mei
Rawn thlentu Pathian a ni.
Baala puithiamten auh eih tur an nei lo,
Thi khawp hialin bei mahse.
A tana thahnem lo leh tilungngai thintu,
Kei ang misual tawngtaina erawh
A lo ngaithla si thin a Lalthutthleng atang chuan
Ka tana a rinawmzia ka hmuh hian,
A tan ka rinawm loh fo zia ka hmu si thin.
Eng thil nge a tan hian ka tih ve ang le?
Lawmthu sawina thilpek hlan dawn ila,
A lungawina phak thil hlu ka nei si lo.
Ka hlan mai nang e ka nun leh ka hun pum hi,
Chu lo thil dang ka nei si lo.
I ziak tha hle mai, hotupa nge nge. Khawvel finna sang zel hian Pathian ropuina themte pawh an la hre si lo.
ReplyDeleteThu awlsam leh hriat thiam awlsam tak, nalh deuh mai in i phuah chhuak thiam tlat mai... Kan Pathian ropui zia hi lo ngainep ve bawl bawl chi a ni lo ve..
ReplyDeleteCaribou leh Beethugs te ka lawm e. He thu hian min luh ngut ngut a, ngaihtuahna ril ber atangin sponteneous takin a rawn luang chhuak a, 10 mins chhungin ka ziak zo ta ngawt a nih hi. Poetic rules and form ka ngaihtuah lo va, ka thinlunga a rik dan ang angin ka chhawp chhuak ngawt a ni e. Analysis lam chu a dawl lo vang, mahse a thu erawh a hlu ka ti.
ReplyDeleteI thuziak hi, a thumal te te chuan ka hriatsa anni hlawm. Hetiang a ngaihnawm erawhin ka remkhawm thiam ve teuh lovang. A dik vel thlup maiin ka hria e.
ReplyDeleteHV, I tilawmawm e. Ka thinlunga lang rawn luang chhuak a nih hi.
ReplyDeleteA ropui khawp mai. A ril ka ti bawk. Ka like mawlh mawlh e.
ReplyDeletelr hlonchhing, ka blog thing thiap thuap i rawn tlawh a ka lawm e.
DeleteE! Hei chu Psalm zinga tel awm tak anih hi, a tha ngawt mai.
ReplyDeletemesjay, nang meuh i rawn leng lut teh hlauh chu inchhuanna tham a ni e.
DeleteA țha hle mai, ka duh lutuk, a comment dan tur pawh ka thiam chuanglo, a țha ka ti hle a ni ka tih chuan a țha hle tihna ni mai ni😂țawngkam ka thiamlo ve bawksia, ka comment lo phallo
ReplyDelete