Aia Upa Zahna

Hnam tinin nun dan mawi, chin dan tha, mahni hnam nunphung mila nunpui kan nei theuh a. Zo nu ze mawi tak pawh hi Pathianin kan hnam nun atana min pek, kan tihbo mai atan ni lovin kan nunpui atana min pek a ni. Kristian sakhua kan vawn hma pawh khan ‘nun dan tha,’ Pathian thu nena inmil thlap tam tak kan nei a ni. Kristian kan nih hnuah Bible hi kan nun hruaitu atana kan pawm avangin kan hnam nun leh kalphung hi Bible zirtirna nen kan en mil fo a tul a ni. Kan hnam nun ze mawi Pathian thu nena inmil thlap a awm nual a ni; entir nan, tlawmngaihna, aia upa zahna, rinawmna, thil neih in sem tlan dial dialna, chhiat ni that nia intanpui, ldt

Hmanlai Mizo nunah chuan aia upate zahna khan hmun a chang lian hle a. Eng pawh ti dawn se, upa zawkte thu an ngaichang a, an thu ang angin an awm mai thin. Upa zawkte kam khat ngai khawpa awm kha an hlau hle a, thil zahthlâk tâwpa ngaih a ni. An zahzia lantîr nan hnathawh leh kawng engkimah awltîr tumin an phe vat vat a, an rorelna hnuaiah an intulut pumhlum thin. Zo nun ze mawi kan sawi fo thinah hian a  hmun pawimawh leh a lailum chang rengtu chu ‘aia upate zahna’ a ni. Mizo nun mawi tak, aia upa zahna hi, tunlaia kan sawi ṭhin –hawihhawmna hi a ni satliah lo va; khawtlang inrelbawlna tihhlawhtlinna te, ram kalna leh hnathawhna hmun hrang hranga kalphung fel leh ṭha a thlen ṭhin a ni. Aia upate zahna khan khawtlanga nun hona leh inrelbawlna fel fai tak a neihtîr ṭhin.

Bawrhsap hlui Major AG McCall, ICS (1931-43) kha sakhaw mi leh mi ṭawng duh tak, Mizote pawh kawm nêlin hmelhriat pawh a ngah hle a. Mizo nun mawi tak mai kha hmu chiangin a ngai sâng thiam hle mai a, ‘Hetiang khawpa nun ṭha leh ropui, hetiang hnam mâwlin an rawn pu chhuak thei hi a mak a ni. An hmânlâi nunah hun eng emaw lai khân hnam ropui zâwk Chinese-ho zîngah emaw an awm tawh a ni ang e,” a lo ti hial a ni. Aia upate zah chungchangah chuan Chinese-ho leh Japanese-ho hi khawvelah an hmingthang lawr hle a, an nun mawi tak chu khawvel hnam dangten an ngai ropui hle a, ‘Eastern Culture’ an ti hial reng a ni. Kan pi leh pute huna an nunphung, aia upate an zahna leh hawihhawmna enin Chinese-ho leh Japanese-ho aiin an hniam bik hauh lo vang le.

Chutiang nun hlû leh ropui chuan tlâk hniam lam a pan a, kan tualzâl nunah pawh upa zawkten ngaih hlut leh zah an hlawh tawh lo niin kan sawi fo ṭhin. Chu nun mawi tak, aia upate zahna chu chawi nuna vawn him a ṭulna lam tawi tê têin ka han tar lang teh ang.

1. Pi pute ro thil hlu a ni: Hla phuah thiam Liandâla chuan aia upate zahna chu ‘pi pute ro thil hlu a ni’ tiin ṭhangtharten kan chawi nun zel theih nan min fuih mawlh mawlh a ni. Kan sawi tawh angin, aia upa zahna hi hawihhawmna a ni satliah lo va, a huhova nun kawngah fel fai zawka khawsak dan tur min kawhhmuhtu a ni.

2. Mizona lan fiahna leh hnam dang laka kan mawina: A bikin khawthlang lam, mi ngohovin ro an relna leh an chiah hnehna hmunah hian aia upa zahna hi a awm lo hle a, chu chuan upate hlutna a tlak hniamtîr niin an sawi ṭhin. Khawchhak lam ramah hian aia upa zahna hi hmuh tur a la tam hle mai a, chu tak chu Mizote tan pawh kan mawina a ni. Hnam dang, a bikin khawthlang lam ramten he nun mawi tak an hmuh hian an lakah kan hnam hi a mawi thar leh ṭhin.

3. Buaina pumpelhna a ni: Khawi iloa chhuah khawm niin, thu leh hla neia rorêltu tur kan mamawh ṭhin. Chutiang hunah tak chuan upa zawkten rorêla thu tlukna an siamte kan pawm thiam hian fel takin kan khawsak theih phah ṭhin. Chuti lova upa zawkte thu rêl lo kalh fo mai leh anmahni zah lo taka awm khumna chuan nunphung a tibuai ṭhin a ni. Upa zawkte zah lo ni mai lo, kut thlâk hial pawh hreh lo kan la awm ṭhinte a pawiin sim a ngai tak zet a ni.

Aia upa zahna tel lovin ‘Zo nun ze mawi’ pawh hi a kim thei lo kan ti thei ang. Chutiang nun mawi tak, hnam tam takin an neih loh chu a tla hniam kan ti ta si a, chhan a nei ngei tur a ni. A tlâk hniam chhan hi zir chian ngai tak, hun rei tak chhui ngai pawh a ni thei ang. Amaherawhchu, va luhchilh thui em em lo pawha lang chiang, aia upate zahna tlâk hniam chhan tlêm tal chu i han zir ho teh ang u.

(a) Chhungkua: Mi thiamte chuan chhungkua hi ‘school hmasa ber a ni a, sawrkar tê ber a ni e’ an ti ṭhin. Mizo chhungkuaah ngat phei chuan, chaw ei lai hi chhungkaw rorel hun a lo ni tawh ṭhin a. Pa berin hna a semin a tu leh fate zilhna hunah a hmang ṭhin. Hmanlaia kan pi leh puten an tih ang diak diak chuan ti tawh lo mah ila, chhungkua chu nun dan mawi leh thil pawimawh dang kan zirna hmun a la ni reng a ni. Aia upate zahnaa tla hniam a nih chuan chhungkuaa inzirtirna a tla hniam ta tihna a ni ngei ang. Chhungkuaa ṭan kan lâk a pawimawhzia a lang ta hle a ni.

(aw) Zirna vang: Thiamna leh finna zawngin zirna lamah kan tlan suau suau a, zirna hmun ṭha nia kan hriat chu kan pan ruak ruak ṭhin. Chutih laiin zirna sikulah chuan ‘aia upa zahna’ leh nun ze mawi dang kan zirtir si loh chuan, chhungkuaa zirtirna dawng lo sikulah pawh dawng chuang si lo an ni dawn a, zirtirna ṭha kan pek si loh chuan naupang lo ṭhang lian zelte kan dem ngawt a rem kher lo vang. Sikulah hian nun dan mawi leh ṭha (moral education) an zir a pawimawh hle a ni.

(b) Sum leh pai vang: Hmasawnnain a ken tel eizawnna hrang hrang avangin ṭhenkhat chuan sum tam tak an la lut a, eizawnna ṭha tak an nei thei a. Chutih laiin, eizawnna kawnga dinhmun ṭha lo, rahbi rap fuh lote chuan an phak tawk aia hniamah an lungawi a ngai fo. Hna hrang hrang kan han thawh tâkah chuan, kan chunga awm kan hotute chu aia naupang takte pawh an ni lo thei lo va. Chutiang hunah chuan, hna thawhna hmunah thuneitu zawk chu naupang zawk an ni thei a, aia upa zawkte an thu anga an khawsak a ṭul lo thei lo. Hei hian khawtlâng nun pawh a nghawng pha hial a, aia upa zahna nun kan lo vawn ṭhin chu a nêk âwn lo thei ta lo a ni. Chutih laiin, hna tawhna hmun leh khawtlâng nun erawh kan thliar hran thiam a pawimawh hle.

(ch) Mahni hnam en hniamna vang: Changkanna kawng kan zawh lai hian, kan hnam nun erawh kan kalsan tial tial em ni a tih theih a. Hnam changkang zawkte nun dan kan hmu a, an khawsak dan pawh kan han pha deuh ruau ruauvin kan hria a. Amaherawhchu, kan hnam nun dan lam erawh kan hmu hniam ta tial tial a, pi leh pute nun mawi pawh chu ‘ṭhing’ ta riauvin kan hria ni ta berin a lang. Hei hi a pawi tak zet a, kan hnam nun kan hmu hniamin mausam ta hial pawh ni ila, kalsanin hnam dangah kan inlet thei lo tih hi kan hriat a pawimawh tak zet a ni. Hnam changkangte bawk hian an hnam nun hlui leh chin dan ṭhinte an ngai sang a, vawn him an tum hle ṭhin zawk a ni. Kan hnam nun, ṭawng leh khawsak dan zawng zawng pawh hi kal san vek mah ila Mizo kan nihna a bo dawn lo va, ‘hnam dang lem chang’ mai bâk kan ni thei dawn chuang lo.

(d) Upa zawkte nun dik loh vang: Upa zawkte hian tih sual kan nei em tih hi kan ngaihtuah tel a ngai tho mai. Hmanlai hun hi kan sawi lo thei lo va, aia upate an zahna kha upa zawkte nun danin a zir vang a ni thui hle niin a lang. Pi leh pute nunah nunphung zirna hmun pawimawh em em – chhungkua leh zawlbûk (mipa tan)te inzirtirna hmun atan an hmang ṭha a, tualzâl nun a ṭhat theih nana inkaihhruaina ṭha tak tak an neihte chuan an nun a vawng ṭha hle a. Chuvangin, aia upate nun khan zah a kai tlangpui niin a lang. Zawhte upata upatna hrim hrim hian zahawmna a keng tel lo va, an nun dan zawkin a keng niin a lang. Chu chu val upate chanchinah te, lal leh an kháwnbâwlte rorel leh thu vuak thlâk dan chanchin kan chhiar theihte atang hian a chiang hle a ni. Zah phu leh zah tlaka nun an uluk si loh chuan naupang zawkte tan chuan, an upat zawk avang ringawtin zah a har fo ngei ang. Chuvangin, kum tam ringawt hi zahawmna a ni lo va, kum tam zawk chuan tawn hriat an ngah zawk a, naupang zawkte tan pawha zahawm taka an khawsak theih ṭhin avanga zah phû leh zah kai ṭhin pawh an ni rêng a ni. Hetia kan sawi avang hian naupang zawkin upa zawkte thu leh hla ngaih pawimawh lem loh tur tihna a ni lo va, zahawmna chu kumah ni lovin nun dan ṭhaah a innghat zawk a; nakin lawka la rawn 'upa' ve tho tur naupang zàwkte pawhin, chutiang nun dan ṭha chu nei ngei tura ṭan an lâk a ngai kan tihna a ni záwk e.

(e) Kan hnam nunphung sawi nghingtu thil pathum vang: Tun kum 150 vel chhung hian Mizo hnam nun (culture) sawi nghing dawt dawttu thil pathum a thleng a, chungte chu British sawrkar awpna (colonization), Kristian sakhua leh tunlaina (modernization) a ni.

1. Bristish sawrkar awpna: British sawrkarin sipai chakna nen kan ram an rawn luh a, min awp tak zelah khan kan hnam nun dan thlak danglam an tum hran lo. Amaherawhchu, hnam chak leh changkang zawk, nun dan (culture) hran daih nei an nih avangin kan hnam nun dan a nghawng danglam lo thei lo. Mizo lalte chu an thu hnuaiah dahin, sai a chak bera mi ngovin thil an ti thei ber tih thu kha min hmuhtir an tum a ni ber. Kuli te, chhiah chawi te, Mi ngoho leh an mi chhawrte thu awih ngai te, pawisa hmantir te, ldt thil tam tak Mizote la hriat ngai loh kha an rawn chhawp chhuak a ni. Chu chuan kan hnam nun zia mawi tak pawh nghawng chin a nei lo thei lo. A nghawng nat ber zinga mi chu aia upa zahna hi a ni awm e. Upa zawk thu ni lovin, thu neitu zawk thu zawm a ngai a, naupang zawk pawh ni se a thu hnuaia awm a aia upa chu zah pahna awm miah lova khawsak khum a lo awm chho tan ta a ni.

2. Mizo culture leh Kristianna: Hmanlai pi pute sakhaw biak bansanin sakhaw thar, Kristian sakhua an vuan ta a, kum 100 pawh a vei hmain a hnam pum pui chu Kristianah kan inlet ta vek a ni. Hei hian kan nun ze mawi tam tak a nghawng lo thei lo. Chuvangin, Kristianna nena inmila kan nun zia kan chhawm chhoh hi a pawimawh ta hle a ni.

3. Mizo culture leh tunlaina (modernization): Kristian nih (Christianization), khawthlang (Sap) nun zir (westernization) leh tunlaina (modernization) hi then hran hleih theih loh khawpin a kal tlang a ni. Kan Zosapte kha an fimkhur viau nain anmahni hnam nun dan lo kha chu rawn chhawm luh tur an nei bik lo va, Sap ram kohhran kalphung leh tih dan bak hriat an nei chuang bawk lo va, an hriat ang ang kha min zirtir ve lo thei lo a ni. Tunlaina (modernization) kan tih hian sawi tur thui tak awm mah se, heti hian ka han sawi tawi mai ang e. Science lama hmasawnnain a hrin chhuah thiamna, khawtlang nunphung lo danglam zel, kut hna ngawr ngawr ni tawh lova khawl hmanga awlsam, rang leh hlawk zawka thawh leh zirna lama hmasawnna, lal rorelna ni tawh lova mipui rorelna leh tunlai hriatna leh thiamna mila kan sakhaw inzirtir dan kalpui te a ni tlangpui ang. He tunlaina hian kan hnam nunphung, pi leh pu atanga kan lo chhawm chu a hrut na lo thei lo bawk a ni.

(f) Sakhaw tel lo nun dan tha (secular humanism): Sakhaw inzirtirna lam tel miah lova finna (reason), nun dan tha (ethics) leh mihring hlimna (human fulfilment) inzirtirna  a ni. Tunlaina kan sawi ang tho khan hei hian hnam nun danphung aiin mi nawlpui nun dan tha (universal ethics) a ngai pawimawh zawk a. Kan hnamin aia upate zahna avanga kan koh dan - ka u, ka nu, ka pa, ka pi, ka pu, ldt a rawn pal zut nasa hle a; chu hnam nun ai chuan thu neihna, hausakna, thiltihtheihna a dah sang zawk a ni. Hemi do let chiah hian sakhaw tel nun dan tha (religious humanism) kan hman thiam a pawimawh hle. Kan sakhua nena inmil ‘Zo nun ze mawi’ ngei mai kha Kristian-te chuan kan vawn nun a tul a, aia upa zahna te phei chu kan Bible zirtirna nen a inmil em em a, upate a dah pawimawhzia hmun hrang hrangah kan hmu a ni (Lev 4:15, Num 11:16, II Chro 10:8, Joba 12:12, Luka 7:3, I Tim 4:14, I Pet 5:5)

Mi rilru nghet lo, tih dan leh duh zawng thlak zung zung chi an dingchhuak ngai lo angin; hnam ro hlu vawn nun nachang hre lo va, hnam dang nun dan la lut zung zung hnam chu hnam ropui an ni thei lo vang. Chuvangin, kan hnam ro hlu pawimawh tak, aia upate zahna hi kan vawn nun reng a pawimawh tak zet a, mi tin mawhphurhna a ni e.

Sawi ho tur

1. Aia upate zahna kan tlak hniamna lai, kan zah tawk lohna lan chianna lai nia kan hriat sawi ho ni se.

2. Kan hnam nun dan a lo danglam chhoh zel avang leh tunlainain min chim nasat tawh avangin, aia upa zahna kan lantir dan pawh her danglam hretin, hawihawmna anga kan kalpui a tulna lai awm theiin kan hria em? Eng kawngah nge ni ang?