FAINA - SCHOOL-AH

 

Ram a changkan ang zelin mihring nun pawh a changkang zel a, nunphung changkang leh hmasawnnain a ken tel tur pawimawh em em chu FAINA hi a ni. Faina tel lo chuan hmasawnna a kim thei lo va, changkang nia kan inhriatna min hnuk hniam theitu pawh FAINA nunpui loh bawk hi a ni. Hrilh chawp leh zirtir chawp lova kan nuna a beh tlat hunah phei chuan khawi hmunah pawh awm ila faina hian min umzui zel dawn a ni. Tuna zirlai la ni mekte hian faina hi kan nunpui tlat a nih chuan khawpui fai leh ram fai kan nei thuai dawn tihna a ni. Chuvangin, tuna zirlai la ni mekte hi kan pawimawh hle a, FAINA kan nunpui theihna turin kan hriat tur pawimawh tarlante hi i ngai pawimawh hram ang u.

1. BAWLHHLAWH A HMUNA PAIH: Kan school leh khawpui a fai loh chhan chu bawlhhlawh a hmuna kan paih loh vang a ni tiin sawi ila faina kawng chu kan sawi zo titih der a ni. Mahni chauha kan awm lai pawhin bawlhhlawh a hmuna kan paih chat chat chuan faina kawngah hna pawimawh tak kan thawk a, mi changkang tak kan ni tihna a ni. Bawlhhlawh kan paih darh loh theuh chuan bawlhhlawh a awm lo mai dawn a, mi tin kan pawimawh hle a ni.

2. BAWLHHLAWH CHHAR: Mahniin tibawlhhlawh lo mah ila mi tihbawlhhlawh chhar fai nachang hria chu mi changkang an ni bawk. School kal leh haw lamah bawlhhlawh kan hmuh chhar nachang kan hriat chuan rei loteah mi dangah a kangkai ngei dawn a, thil tha tak, tawng lova mi dang kan zirtir theihna a ni tel reng a ni. Bawlhhlawh chhar dah khawmna tur bag kan ken tel theih phei chuan a remchang lehzual ang.

3. BAWLHHLAWH HMAN NAWN LEH: Bawlhhlawh zinga hmuh tur tam ve tak chu plastic/glass bottle a ni. Tawih ral mai thei an ni lo va, glass bottle phei chu hal ral theih a ni lo. Kan leilung tichhetu an ni a, tihral erawh harsa tak a ni thung. Chuvangin, a hman nawn leh dan kawng kan zawn a tha berin a lang. Zirlaiten kan zirlai bakah kut themthiamna lam kan zir tel a ngai a. Heng bottle paih darh mai mai te hi a tangkai zawngin hman tum ila, chei mawi, hun mawi leh tar mawi atan a hman theih a ni. Bottle chei, pen leh thil dang dahna, school hungna chei mawi nan, leh kawng dang tangkaia kan hman theih chuan bawlhhlawha kan ngaihte hi a hlu hle dawn a lo ni.

4. TAWIH THEI LEH HAL RAL THEIH DAH HRAN: Classroom tinah bawlhhlawh bawm pahnih dahin tawih thei leh hal ral theih dah hran ni se. Hal ral theih chu a halna hmuna halin tawih thei pawh a khur siama paih hran ni se. Bawlhhlawh halna hmun hi a kangin, lung/leirawhchana siam ni se, tawih ral thei a khura kan paih hian lei tha a siam thei bawk a ni. Hetiang siamna tur hmunhma nei lo erawh bawlhhlawh dahkhawmna chhin/tawn phui theih neih ngei a tul ang.

5. KAWR LEH KHAMAH PAIH LOH TUR: Khamah emaw luikawrah emaw bawlhhlawh paih mai kan ching hle, hei hi a pawi tak zet a ni. Khama kan paih darh hian kangmei a hlauhawm a, leilung tan a pawi a, hriselna atan pawh a tha lo hle a ni. Luikawra kan paih hian sabereka khuangkaih a siam thei a, mi tam tak nunna latu a ni thin. Tin, tlangram kan nih avangin luikawrte hian lui lian zawk a fin a, tuia cheng rannung – sangha, chakai, chengkawl, kaikuang, ldt tan a pawi a, an thih phah thei bawk a; tin, chung tuia chengte chu kan ei duh bawk si avangin mahni tura inhrai mai kan ni thei bawk. Tunah phei chuan khawpui hrang hranga kan tui inte hi lui tui pump chhuah a ni a, kan bawlhhlawh paih thli kan in leh tiin a sawi theih hial ang.

6. FAINA INTIHSIAK: School-a class hrang hrangten Faina intihsiakna (Cleanliness Competition) neih a tha khawp mai. Classroom fai ber thlangin lawmman pawh siam thin ni se.

7. FAINA ENKAWLTU BIK (Cleanliness Squad): School-ah zirtirtute kutah dah mai lovin zirlaite atangin Faina Enkawltu (Cleanliness Squad) din ni se. A tul angin Class tin leh school chhehvel faina endikin hma lak a tul anga bawhzui thin ni se.

8. FAINA KAWNGZAWH (Cleanliness Walk): School awmna khua/vengah Faina kawngzawh neih hi mi dangte zirtirna atan pawh tha tak a ni. Bawlhhlawh chharin a paih khawmna hmunah paih leh mai ni se.

9. FAINA HRISELNA: Faina hriselna hi inkawp tlat an ni. Natna kan kai theih tam tak hi hmun bawlhhlawh atanga insiam a ni a, kan chhehvel a fai chuan chung natna hrikte chu kan pumpelh thei a ni.

10.BAWLHHLAWH BAWM DAH RUAH CHAWLHKAR. A Sap tawngin ‘Empty Dustbin Week’ hi faina kawnga hma lakna pawimawh tak niin, zirlaiten an mawhphurhna an hriat nan leh leilung enkawl a pawimawhzia an hriat theih nana duan a ni. Kar khat chhung hun hman a ni ang a, hetih chhung hian school-a bawlhhlawh bawm chu hman a ni lo vang a, a ruakin a awm tur a ni. Zirlaiten an bawlhhlawh zawng zawng chu school-a kalsan lovin anmahni in lamah an hawn leh vek ang a, fel takin a hmunah an paih ang. He hma laknain a tum ber chu faina nunpui a, school chhunga bawlhhlawh tihtlem leh ei in tur thlan fimkhur a ni.

Mi Changkang chuan Faina a ngaina a, Faina chuan hriselna a ken tel avangin Ram fai Ram hrisel kan neih theih nan mi tinin mawh kan phur theuh a ni.